Ռուստամ Բադասյանը Բրյուսելում մասնակցել է «Արևելյան գործընկերությունը հանուն ԵՄ-ի» խորագրով համաժողովին

05-12-2019 18:54:30   | Բելգիա  |  Մամլո հաղորդագրություն
 


Հայաստանի Հանրապետության արդարադատության նախարար Ռուստամ Բադասյանը Բելգիայի Թագավորության մայրաքաղաք Բրյուսելում այսօր մասնակցել է «Արևելյան գործընկերությունը հանուն ԵՄ-ի» խորագրով համաժողովին:
Նախարարը շնորհակալություն է հայտնել հրավերի համար և նշել, որ Հայաստանն իր ողջ պատմության ընթացքում պահպանել է ԱլԳ հիմքում ընկած արժեքները՝ ժողովրդավարությունը, մարդու իրավունքների պաշտպանությունը, օրենքի գերակայությունը, և դրանք խորապես արմատավորված են ազգային գիտակցության մեջ, ինչի վառ ապացույցը 2018 թվականին Հայաստանում տեղի ունեցած թավշյա հեղափոխությունն է:
«Մեր Կառավարությունը շարունակում է խստորեն հավատարիմ մնալ օրենքի գերակայության ամրապնդմանը, մարդու իրավունքների պաշտպանությանը, կոռուպցիայի
դեմ անզիջում պայքարի և հավակնոտ դատական բարեփոխումների արդյունավետ իրականացմանը՝ Սահմանադրությանը և ստանձնած միջազգային պարտավորություններին համաձայն: Մենք հավատում ենք, որ որպես Կառավարություն՝ ունենք մեծ հնարավորություն մեր ժողովրդի վստահությունը փոխակերպելու ուժեղ ինստիտուտների կայացմամբ, օրենքի գերակայության ամրապնդմամբ, անվտանգության ապահովմամբ և ներառական ու պատասխանատու հասարակության կառուցմամբ: Մեր ժողովուրդը մեզ տվել է աննախադեպ մանդատ ՝ իրենց կյանքում փոփոխություններ մտցնելու համար. դա է մեր հիմնական պատասխանատվությունը»,- ասել է Ռուստամ Բադասյանը:
Իրականացվող բարեփոխումների համատեքստում նախարարն առանձնացրել է Հայաստան-ԵՄ համագործակցության կարևոր դերը՝ Համապարփակ և ընդլայնված գործընկերության համաձայնագրի շրջանակում՝ վերահաստատելով Կառավարության հանձնառությունը` Համաձայնագրից բխող ճանապարհային քարտեզի արդյունավետ և պատշաճ իրականացման վերաբերյալ: 
Ելույթում նախարարն անդրադարձել է նաև Կառավարության կողմից ընդունված Դատաիրավական բարեփոխումների, Հակակոռուպցիոն ու Քրեակատարողական և պրոբացիայի ոլորտի ռազմավարություններով նախատեսված միջոցառումներին, ինչպես նաև մշակման փուլում գտնվող Մարդու իրավունքների պաշտպանության ազգային ռազմավարության նախագծին: Բացի այդ, Ռուստամ Բադասյանը հայտարարել է, որ Արդարադատության
նախարարությունը ստանձնել է քաղաքական հանձնառություն՝ աջակցելու Հայաստանում ոստիկանության բարեփոխումներին: Այդ նպատակով  կմշակվի ոլորտի բարեփոխումների վերաբերյալ ռազմավարություն, որն ուղղված կլինի Ոստիկանության նկատմամբ հասարակության վստահության բարձրացմանը, այդ հաստատություններում մարդու իրավունքների պաշտպանությանը, ընտանեկան բռնության դեմ պայքարի շրջանակում Ոստիկանության ծառայողների կարողությունների զարգացմանը և այլն:
 
 
ՀՀ ԱՆ տեղեկատվության և  
հասարակայնության հետ կապերի վարչություն
 
Նոյյան տապան   -   Մամլո հաղորդագրություն
Լուրեր Հայաստանից եւ Սփյուռքից

Կարդացել են 1262 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար