Մնացականյան-Մամեդյարով հանդիպումից առաջ ՌԴ ԱԳՆ-ն տհաճ անակնկալ է մատուցել Բաքվին

18-01-2020 11:27:31   | Ռուսաստան  |  Ի՞նչ է գրում մամուլը
ՌԴ ԱԳՆ-ի կայքում զետեղվել է նախարար Լավրովի ասուլիսին նախապատրաստված ու այդպես էլ չհնչած հարցի պատասխանը Արցախի հակամարտության մասին: Դրանում մասնավորապես ասվում է, որ թեեւ տեղաշարժեր կան «փոքր քայլերի» իրականացման հարցում՝ սահմանում եւ շփման գծում իրադրությունը հարաբերականորեն հանգիստ Է, Երեւանի եւ Բաքվի միջեւ կապի թեժ գիծ Է գործում, սակայն կարգավորման բովանդակային հարցերի շուրջ առաջ շարժվել առայժմ չի հաջողվել:
 


Հունվարի վերջին սպասվում է Մամեդյարով-Մնացականյան հանդիպում, հայտարարել է Ապշերոնյան վարչակարգի ԱԳ նախարար Մամեդյարովը: Արձագանքելով, Հայաստանի ԱԳՆ խոսնակը հայտարարել է, որ «ՀՀ ԱԳՆ-ն յուրաքանչյուր հանդիպման մասին տեղեկացնում է ընդունված կարգով՝ ԵԱՀԿ Մինսկի խմբի համանախագահների միջոցով բոլոր մանրամասների համաձայնեցումից հետո: Մենք շարունակում ենք կիրառել հանդիպումների հանրայնացման այդ պրակտիկան»:
 
Այս էլ որերորդ անգամ Մամեդյարովը առաջ է ընկնում եւ հայտարարում սպասվող հանդիպման մասին: Ընդ որում, դա ուղեկցվում է սահմանին զինված սադրանքներով, ինչպես
երեկ հայ զինծառայողի հրազենային վիրավորումը: Այդպիսով փորձ է արվում շարունակել շանտաժի պրակտիկան եւ ցույց տալ սեփական «գերակայությունը» բանակցային գործընթացում:
 
Ընդ որում, սադրանքները շարունակվում են նաեւ հանդիպումներից հետո, երբ Բաքուն հայտարարում է, թե առարկայական բանակցություններ են ընթանում, ինչը զարմանալիորեն լայն արձագանք է գտնում հայաստանյան որոշակի շրջանակների մոտ:
 
Մյուս կողմից, հանդիպումների շտապ ազդարարումն ավելի շուտ վկայում է նյարդային որոշակի իրավիճակի մասին: Բանն այն է, որ հայկական կողմի նոր մոտեցումների արդյունքում Բաքուն կանգնել է լուրջ խնդիրների առաջ: Մասնավորապես, թե Բաքուն, թե Մինսկի խմբի համանախագահները մինչ այժմ չեն պատասխանել պաշտոնական Երեւանի հարցադրումներին, որոնք վերաբերվում են այսպես կոչված կարգավորման սկզբունքների մեկնությանը:
 
Երեւանն այսպիսով կարողացել է կարգավորման գործընթացը հանել Բաքվի իրավունքների տրամաբանությունից, այդպիսով անիմաստ դարձնելով Բաքվի ավանդական մեթոդները:
 
Այս ֆոնին, ՌԴ
ԱԳՆ-ն Մամեդյարով-Մնացականյան հավանական հանդիպումից առաջ տհաճ անակնկալ է մատուցում Բաքվին՝ հայտարարելով, որ առարկայական կամ բովանդակային հարցերում առաջ շարժվել չի հաջողվել, թեեւ վերջին անգամ հայկական կապիտուլյացիայի պլանով մաքոքային այցերին Լավրովը անորոշ ակնարկներ էր շռայլում այս հարցում:
 
Ի՞նչ է հայտարարելու Բաքուն հերթական հանդիպումից հետո:
 
 
 
Նոյյան տապան   -   Ի՞նչ է գրում մամուլը
Լուրեր Հայաստանից եւ Սփյուռքից

Կարդացել են 676 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար